● ASMA E HUSNA :- (یَا بَاسِطُ) YA BAASITU ●

        ■ AMALIYAT ASMA E HUSNA ■

♥Asma e Husna :- Ya Baasitu (یَا بَاسِطُ) Ki fazilat o Wazaif

★ Allah Ta'ala Ka Ek Sifati Naam Hai Ya Baasitu. Yani Ai Kushada Karne Wale. Rehmat, Rozi Aur Ne'amat Ko Kushada Karne Wala Allah Hi Hai. Is Lafz Ki Barkat Ye Hai Ke Is Ke Waseele Se Allah Har Tang Ki Hui Chiz Ko Kushada Kar Deta Hai. Jaise Baasit Wo Zaat Hai Ke Jo Logo Ka Rizk Kushada Kare Ke Qurane Pak Me Is Ke Hawale Se Aayate Maujud Hai. Ye Isme Pak Jamali Hai Aur Kul Adad Qamari Is Ism Ke 72 Hai

★ Bad Namaze Isha Agar Is Isme Pak Ko 10 Bar Padh Liya Kare To Is Ki Barkat Se Insha Allah Rizk Me Farakhi Hasil Hogi

★ Agar Koi Shakhs Is Isme Mubarak Ko Apne Naam Ke Majmooi Adad Ke Mutabik Padhe To Jis Maksad Ke Liye Padhega Wo Allah Ke Fazl Aur Karam Se Us Me Kamyabi Milegi Aur Band Darwaze Khul Jayenge

★ Jis Aurat Ka Shauhar Bad Akhlaq Ho, Aawara Aur Bad Mijaz Ho Wo Aurat Agar 300 Bar Ye Isme Pak Padh Kar Pani Par Dam Kar Ke Shauhar Ko Pilaye Ya Kisi Khane Ki Chiz Me Wo Pani Mix Kar Ke Khila De. Amal Lagatar 7 Din Tak Kare To Allah Ke Hukm Se Shauhar Ki Bad Akhlaqi dur Hogi

★ Jo Shakhs Rozana Ye Isme Pak Subah Ke Wakt Me 100 Bar Padhne Ka Apna Mamool Bana Le To Allah Us Ke Rizk Ko Kushada Kr Deta Hai Aur Wo Shakhs Kisi Ka Mohtaj Nahi Hota

★ Agar Kisi Ka Shauhar Biwi Se Gali Galoch Aur Gandi Zaban Se Bat Karta Ho, Hamesh Bura Bhala Kehta Ho To Biwi Ko Chahiye Ke Ye Isme Pak Rozana 7300 Bar Padh Kar Dua Kar Ke Shauhar Ko Pilati Rahe. Amal 21 Din Tak Kare

★ Agar Koi Shakhs Ye Chahe Ke Wo FarakhDil  Aur Sakhawat Karne Wala Ban Jaye To Is Isme Pak Ko Rozana 72 Bar Padhne Ka Apna Mamool Bana Le. Insha Allah Us Ke Dil Me Allah Ki Raah Me Dil Khol Kar Paisa Kharch Krne Ki Aadat Ban Jayegi Aur Allah Use Ataa Bhi Karega

★ Jo Koi Shakhs Ye Isme Pak Rozana Bad Namaze Fajar Hath Utha Kar 10 Bar Padh Kar Apne Dono Hatho Par Dam Kar Ke Fir Chehre Par Fer Liya Kare To Har Jaiz Hajat Puri Hua Kare

★ Agar Juma Ke Din Pehli Sa'at Me Anguthi Ke Andar Is Isme Pak Ka Naksh Rakh Kar Band Kar Ke Pehne To Beshumar Khushiya Hasil Ho Aur Jo Dekhe Wo Maherban Ho

★ Ulema E Kiram Farmate Hai Ke Ye Isme Pak Ka Zikr Hazrte Israfeel Alaihissalam Karte Hai. Is Isme Pak Ka Zikr Karne Wale Par Rizk Behad Kushada Kar Diya Jata Hai

★ Ye Isme Pak Ya Baasitu Ka Naksh Rizk Me Bakat Ke Liye Bhi Bahot Mufeed Mana Jata Hai. Jo Banda Is Isme Pak Ka Aamil Ho Wo Is Ka Naksh Likh Ke De Skta Hai. Is Isme Pak Ka Aamil Banne Ke Liye Parhez Jalali Jamali Ke Sath Chille Ki Tamam Sharto Par Amal Karte Hue 40 Din Me Kul 5 Lakh Ki Tadad Mukammal Kare. Yani Rozana Isha Ke Bad 12500 Bar Zikr Kiya Kare. Awwal Aakhir 11 Bar Aayatul Kursi Aur 11-11 Bar Charo Qul Padhe. Insha Allah 40 Din Me Is Isme Pak Ka Aamil Ban Jayega. Us Ke Bad Rozana 72 Bar Vird Me Rakhe. Fir Is Isme Pak Ka Naksh Jis Ko Bhi Dega Use Fayda Hoga

★ Ye Wazeefa Is Isme Pak Ka Jama Wazeefa Hai. Jis Ne Is Wazeefe Ko Hamesha Ke Liye Apna Liya Use Allah Ke Hukm Se Rizk Ke Liye Dusra Koi Amal Padhne Ki Hajat Nahi Rahegi. Is Wazeefe Ko Rozana 1100 Bar Pabandi Ke Sath Bad Namaze Fajar Padh Liya Kare. Agar Allah Razi Ho Gaya To Gaib Se Daulat Ke Khazane Khol Dega Aur Kisi Chiz Ki Kami Nahi Rahegi. Wazeefa Ye Hai :-

یَا بَاسِطُ الَّذِی یَبْسُطُ الرِّزْقَ لِمَنْ یَّشآءُ بِغَیْرِ حِسَبٍ

◆ ROOHANI ILAJ Group me shamil hone ke liye Apna Name, whatsapp Mobile no. aur City name niche diye gaye no pe msg kare...

+91 99795 78644

● ROOHANI ILAJ ki Purani Post Hasil Karne k Liye Is Link Par Visit Kare :

www.faizeroohani.wordpress.com

● ASMA E HUSNA :- (یَا قَابِضُ) YA QAABIDU ●

          ■ AMALIYAT ASMA E HUSNA ■

♥ Asma e Husna :- Ya Qaabidu (یَا قَابِضُ) Ki fazilat o Wazaif

★ Allah Ta'ala Ka Ek Sifati Naam Al Qaabidu Bhi Hai. Yani Ai Qabz Karne Wale. Qabz Karna Yani Rok Lena Ya Chhin Lena. Allah Ta'ala Apni Makhlooq Ke Liye Qabiz Ki Bhi Sifat Rakhta Hai. Jis Se Jo Chahe Chhin Le Ya Kisi Ka Rizk Rok De Ya Koi Ne'amat Chhin Le. Jab Banda Koi Gunah Karta Hai Ya Allah Ki Kisi Ne'amat Ka Shukr Ada Nahi Karta To Rabbe Kaenat Fir Us Bande Ki Ne'amate Chhin Leta Hai. Kuch Logo Ke Aa'mal Bhi Ese Hote Hai Ke Jis Ki Nahoosat Se Un Par Un Ka Rizk Tang Kar Diya Jata Hai. To Kabhi Kabhi Parwar Digar Bande Ki Aazmaish Ke Taur Par Bhi Kuch Chize Qabz Kar Ke Imtehan Me Mubtela Farmata Hai. Goya Isi Wajah Se Allah Ko Is Naam Se Bhi Pukara Jata Hai. Rabbe Kaenat Ne Apni Is Sifat Ka Bhi Zikr Qurane Pak Me Farmaya Hai. Ye Isme Pak Jalali Hai Aur Is Ke Kul Adad Qamari 903 Hai

★ Ye Isme Pak Har Kism Ki Buri Aadat Aur Nashe Ko Khatm Karne Ke Liye Bahot Muassir Hai. Aise Log Jo Sharab Ya Charas Ya Kisi Aur Nashe Me Ya Fir Kisi Buri Aadat Me Mubtala Ho Gaye Ho Un Ki Buri Aadato Ko Dur Karne Ke Liye Is Isme Pak Ko Maa Ya Baap Ya Biwi Me Se Koi 41 Din Tak Rozana 5418 Bar Padha Kare Aur Rozana Dua Kar Ke Pani Par Dam Kar Ke Pilate Rahe. Insha Allah Us Ki Buri Aadat Khatm Hogi

★ Aisi Aurat Jo Aawara Aur Bad Chalan Ho, Jo Bacho Ki Maa Bhi Ban Gayi Ho Fir Bhi Burai Se Na Rukti Ho Aur Lagatar Shauhar Ki Dil Aazari Ka Sabab Banti Ho Us Ke Shauhar Ko Chahiye Ke 40 Din Tak Rozana 12500 Bar Ye Isme Pak Padhta Rahe Aur Aakhari Din Pani Par Dam Kar Ke Biwi Ko Pilaye. Insha Allah Wo Aurat Badkari Chhod Degi

★ Ye Isme Pak Jadu, Jinnat, Aaseb Aur Balao Se Bachne Ke Liye Bhi Mufeed Hai. Jo Shakhs Rozana Bad Namaze Fajar Aur Rat Ko Sote Wakt 33 Bar Ye Isme Pak Padh Liya Kare To Us Par Kabhi Jadu Ka Waar Nahi Chalega Aur Wo Hamesha Allah Ki Panah Me Rahega. Agar Koi Dushman Us Bande Par Kale Ilam Ka Waar Karega Bhi To Allah Is Naam Ki Barkat Se Us Waar Ko Qabz Kar Lega

★ Agar Kisi Dushman Se Jaan Maal Ka Khatra Rehta Ho To 11 Din Tak Rozana Dushman Ka Khayal Kar Ke Isha Ke Bad 903 Bar Is Niyat Se Padh Liya Kare Ke Allah Us Dushman Ko Dushmani Se Rok De Yani Wo Kisi Kism Ka Nuksan Na Pahochaye Aur Allah Ki Bargah Me Dua Kare. Allah Ke Hukm Se Dushman Ka Khauf Khatam Ho Jayega

★ Agar Seese (Ek Kism Ki Dhatu) Ki Takhti Par Is Isme Pak Ke Naksh Ko Sharf e Zuhal Me Likh Kar Pas Rakhe Aur Is Isme Pak Ka 903 Bar Vird Kare Aur Kahe Ke Fula Shakhs Ka Dil Qabz Kar To Dua Qubool Hone Par Us Shakhs Ka Dil Murda Ho Jata Hai. Kisi Shakhs Ki Koi Buri Aadat Dur Karne Ke Liye Ye Amal Kam Me Liya Ja Sakta Hai

★ Jo Koi Shakhs Is Isme Pak Ko Wazeefa Bana Kar Jis Ki Halakat Ke Liye Irada Kar Ke Rozana Padhe Aur Bad Vird Naam Le Kar Padha Kare To Jis Ka Naam Le Kar Padhta Raha Wo Jaldi Hi Halak Ho Jaye. Lekin Kisi Par Na Haq Zulm Kiya To Khud Apni Halakat Ke Liye Taiyar Rahe

★ Is Isme Pak Ka Zakir Apne Andar Safa e Batin Ke Mawafiq Apne Andar Aasar Dekhega Aur Is Isme Pak Ki Barkat Se Us Ke Andar Ki Tamam Buraiya Dur Ho Jayegi

★ Is Isme Pak Ko 40 Din Tak Lagatar Rozana 4 Niwalon Par Likh Kar Khata Rahe Aur Allah Is Ke Amal Ko Qubool Farma Le To Banda Allah Ke Fazl Se Hamesha Bhook Se Mehfuz Rahega

★ Ye Zikr Hazrte Izrail Alaihissalam Jo Maut Ke Farishte Hai Un Ka Hai. Ulema Farmate Hai Ke Aap Isi Isme Pak Ke Aamil Hai Aur Allah Ke Hukm Se Isi Isme Pak Ki Barkat Se Rooh Qabz Farmate Hai

★ Jo Koi Shakhs Rozana Namaz Ki Pabandi Ke Sath Namaze Fajar Aur Namaze Magrib Ke Bad 21 Bar Ye Isme Pak Padh Liya Karega To Us Bande Par Kabhi Jadu Asar Nahi Karega Aur Kisi Ki Bad Dua Bhi Asar Nahi Karegi Aur Na Hi Jinn Bhut Ka asar Hoga. Banda Har Tarah Ki Balai Balao Se Mehfuz Rahega

★ Jo Koi Is Isme Pak Ko Rozana 180 Bar Padh Kar Apne Upar Dam Kar Liya Kare To Dushmano Ki Makkari Aur Nuksan Pahochane Ki Harkato Se Mehfuz Rahega

★ Is Isme Pak Ka Aamil Banne Ke Liye Pak Saf Kamre Me Chille Ki Tamam Sharto Par Amal Karte Hue Tanhai Me Parhez Jalali Jamali Ke Sath 100 Din Tak Rozana Isha Ke Bad 11000 Bar Padhte Rahe To Insha Allah Is Isme Pak Ke Aamil Ban Jayenge. Us Ke Bad Rozana 100 Bar Vird Karte Rahe Ta Ke Amal Ki Taseer Kayam Rahe. Us Ke Bad Is Isme Pak Ka Naksh In Tamam Fazail Ke Liye Diya Ja Sakta Hai

◆ ROOHANI ILAJ Group me shamil hone ke liye Apna Name, whatsapp Mobile no. aur City name niche diye gaye no pe msg kare...

+91 99795 78644

● ROOHANI ILAJ ki Purani Post Hasil Karne k Liye Is Link Par Visit Kare :

www.faizeroohani.wordpress.com

● ASMA E HUSNA :- (یَا عَلِیْمُ) YA ALEEMU ●

          ■ AMALIYAT ASMA E HUSNA ■

♥ Asma e Husna :- Ya Aleemu (یَا عَلِیْمُ) Ki fazilat o Wazaif

★ Allah Ta'ala Ka Ek Sifati Naam Ya Aleemu Bhi Hai. Yani Ai Ilm Wale. Ye Isme Pak Ka Zikr Qurane Pak Ki Kai Aayato Me Milta Hai. Beshak Allah Ta'ala Ko Kaenat Ke Zarre Zarre Ka Ilm Hai. Wo Har Chiz Ko Janne Wala Hai. Yani Ajal Se Abad Tak Ki Har Chiz Us Ke Ahatae Ilm Me Hai. Har Chhoti Aur Badi Chiz Ki Ibteda Aur Inteha Ko Janta Hai. Is Lihaz Wo Aleem Bhi Hai. Ye Isme Pak Jamali Hai Aur Is Ke Kul Adad Qamari 150 Hai

★ Agar Koi Shakhs Is Isme Pak Ko Rozana Bad Namaze Fajar 150 Bar Padhne Ki Apni Aadat Bana Le To Allah Ta'ala Us Ke Ilm Me Be Panah Izafa Ata Farmayega Aur Uloom e Batin Munkashif Honge

★ Agar Kisi Ke Bache Padhai Me Behad Kamzor Ho Aur Khas Kar Ke Aise Student Jin Ko Padha Hua Yaad Na Rehta Ho To Wo Ya Un Ke Maa Baap Is Isme Pak Ko Rozana Subah Uth Kar Is Isme Pak Ko 53 Bar Padh Kar Pani Pe Dam Kar Ke Nihar Muh Pilaya Kare. Insha Allah Kuch Hi Arse Me Tarakki e Ilm Hasil Hoga. Is Amal Ko Lagatar 1 Saal Tak Jari Rakhe

★ Agar Koi Is Isme Pak Ka Khula Vird Kare Yani Chalte Firte Bina Ginti Ke La Tadad Padhta Rahe To Haq Ta'ala Ki Maarefat Ata Ho Aur Us Ka Dil Noorani Ho

★ Jo Koi Har Namaz Ke Bad 150 Bar YA AALIMUL GAIB (یا عالم الغیب) Padhta Rahe To Use Bahot Jald Kashf Ki Daulat Ata Hogi

★ Jo Koi Poshida Kamo Par Aagahi Chahe To Istekhara Ki Niyat Se Shab e Juma Me Bad Namaze Isha Ye Isme Pak YA ALEEMU 100 Bar Padhe Aur Maksad Ki Dua KAre. Fir Bagair Bat Chit Kiye Maksad Ka Tasawwur Karte Hue So Jaye. Insha Allah Jis Kam Ke Bare Me Janna Chahega, Pata Chal Jayega. 3 Shab e Juma Tak Kare

★ Jo Koi Para Basta (Ek Kism Ki Dhaatu) Ki Takhti Par Sharf e Utarid Me Is Isme Pak Ko Qanda Karwa Kar Apne Pas Rakhe To Allah Ta'ala Use Ilm Me Me Be Panah Tarakki Ata Farmata Hai. Sharf e Utarid Ka Wakt Takriban Har 2 Mahine Me Aata Hai. Ye Wakt Kisi Bhi Jantari Se Hasil Kiya Ja Sakta Hai

★ Jo Koi Sa'at e Mushtari Chandi Ki Takhti Par Is Isme Pak Ka Naksh Qanda Karwa Kar Apne Pas Rakhe Use Uloom e Shara'eeya Ki Faham Hasil Ho

★ Is Isme Pak Ke Zakir Se Log Mutee'a Honge Aur Wo Har Aafat Se Mehfuz Rahega, Burai Se Dur Rahega Aur Is Isme Pak Ke Zakir Ko Wo Baate Maloom Hogi Jo Koi Nahi Janta

★ Jis Ka Hafeza Kamzor Ho Wo Rozana Ye Isme Pak Chini Ki Plate Par Jafran Aur Arq e Gulab Se Likh Kar  Shahad Me Mila Kar Chaat Liya Kare. Kuch Arse Me Us Ka Hafiza Qawi Ho Jayega

★ Jo Shakhs Ye Chahe Ke Meri Hajat Puri Ho, Use Chahiye Ke Mangal Ke Din 2 Raka'at Nafl Namaz Salatul Hajat Ki Niyat Se Padhe. Salam Ferne Ke Bad Ye Isme Pak 1000 Bar Padh Kar Rabbe Kaenat Ki Bargah Me Hajat Puri Hone Ka Suwal Kare. Parwar Digar Apne Fazl Wa Karam Se Hajat Puri Karega

★ Jo Shakhs Ilm e Deen Ke Husul Me Dushwari Ya Koi Rukawat Mehsus Karta Ho To Use Chahiye Ke Is Isme Pak Ka Kasrat Se Vird Kiya Kare. Insha Allah Har Rukawat Dur Hogi Aur Aasaniya Paida Hogi. Allah Us Par Ilm Ki Raahe Khol Dega Aur Agar Koi Aalime Deen Is Ko Kasrat Se Padhe To Us Ke Ilm Me Izafa Hoga

★ Agar Koi Shakhs Kisi Kam Ka Anjam Maloom Karna Chahe Yani Istekhara Ka Irada Kare Ke Ye Kam Us Ke Liye Behtar Hai Ya Nahi... To 7 Din Tak Rozana Sote Wakt Is Isme Pak Ko 900 Bar Padhe Aur Apna Maksad Dil Me Rakh Kar Kisi Se Bat Chit Kiye Bagair So Jaye. Insha Allah Isi Dauran Ishara e Gaibi Se Us Ko Pata Chal Jayega

★ Agar Koi Kisi Tijarat Ke Bare Me Ya Safar Ke Bare Me Ya Fir Rishte Ke Bare Me Istekhara Ka Irada Rakhta Ho To Shab e Juma Me Isha Ke Bad So Jaye Aur Fir Aadhi Rat Ke Bad Uth Kar Wuzu Kar Ke Tahajjud Ada Kare Us Ke Bad 2 Raka'at Nafl Padh Kar Salam Fer Kar 150 Bar Ye Isme Pak Padhe Fir So Jaye. Insha Allah Jawab Mil Jayega. 3 Shab e Juma Tak Kare

★ Aksar Maa Baap Ki Shikayat Rehti Hai Ke Bacho Ka Padhai Me Dil Nahi Lagta. Aise Bacho Ka Dil Padhai Me Lagane Ke Liye Aur Sab Kuch Yaad Rahe Is Ke Liye 40 Din Tak Rozana 1100 Bar Ye Isme Pak Ka Vird Kar Ke Pani Pe Dam Kar Ke Pilaya Kare. Insha Allah Bacho Ka Dil Padhai Me Bhi Lagega Aur Zehan Bhi Tez Ho Jayega

★ Jo Hazrat Peer e Tarikat Ho Aur Sahibe Kashf Banna Chahte Ho To Unhe Chahiye Ke Is Isme Pak Ko Rozana 11000 Bar Padhne Ka Mamool Bana Le. Insha Allah Un Ka Batin Khul Jayega Aur Wo Sahibe Kashf Ban Jayenge. Jis Qabr Par Jayenge Maloom Ho Jayega Ke Murde Ka Kya Haal Hai, Jis Mazar Par Jayenge Waha Sahibe Mazar Se Mulakat Hogi Aur Ilm o Ma'arefat Ke Darwaze Khul Jayenge

★ Agar Koi Shakhs Ye Chahe Ke Meri Hajat Jald Puri Ho To Use Chahiye Ke Wuzu Kar Ke Shaher Ya Gaon Ki Aabadi Se Bahar Veerane Me Chala Jaye Aur Waha Tanhai Me 2 Raka'at Nafl Namaz Baraye Rafa Hajat Padhe. Us Ke Bad Qibla Ki Taraf Hi Rukh Kar Ke 1000 Bar Ye Isme Pak Padhe. Insha Allah Us Ki Hajat Puri Ho Jayegi

★ Hzrt Shah Kaleemullah Shahjahan Aabadi Ka Qaul Hai Ke Ye Jama Wazeefa Istekhara Ke Liye Bahot Hi Mujarrab Mana Jata Hai. Tarika Ye Hai Ke Pehle 2 Raka'at Nafl Namaz Istekhara Ki Niyat Se Padhe. Fir Apne Bistar Pe Baith Kar Qibla Ki Taraf Rukh Kar Ke Ye Mukammal Wazeefa 100 Bar Padhe. Us Ke Bad Khamoshi Se Bagair Bat Chit Kiye So Jaye. 7 Raato Ke Andar Andar Allah Ke Hukm Se Jawab Mil Jayega. Wo Jama Wazeefa Ye Hai :-

یا علیم علمنی یا رشید ارشدنی یا خبیر اخبرنی

(YA ALEEMU ALLIMNI YA RASHIDU ARSHIDNI YA KHABIRU AKHBIRNI)

★ Is Isme Pak Ka Aamil Banne Ke Liye Parhez Jalali Jamali Ke Sath Chille Ki Tamam Sharto Ko Pura Karte Hue Ek Hi Jagah Aur Wakt Ke Sath 100 Din Tak Rozana Isha Ke Bad 11000 Bar Padhta Rahe. Insha Allah Aamil Ban Jayenge. Us Ke Bad Is Isme Pak Ka Naksh Aur Wazaif Ke Zariye Logo Ko Fayda Pahochaya Ja Sakta Hai

★ Is Isme Pak Ka Naksh Khas Kar Ke Un Logo Ke Liye Behad Mufeed Hai Jo Ilm e Deen Ka Kamal Hasil Karna Chahte Hai Lekin Zehan Ki Kami Ya Quwwate Hafiza Ki Kami Ki Wajah Se Unhe Qadam Qadam Par Dushwariyo Ka Samna Karna Padta Hai. Aise Talba Ke Liye Is Isme Pak Ka Ye Naksh Teer Ba Hadaf Kam Karta Hai. Is Ke Istemal Se Zehaniyat Me Aur Quwwate Hafiza Me Bhi Izafa Hota Hai
(NAKSH KI IMAGE YE HAI)

◆ ROOHANI ILAJ Group me shamil hone ke liye Apna Name, whatsapp Mobile no. aur City name niche diye gaye no pe msg kare...

+91 99795 78644

● ROOHANI ILAJ ki Purani Post Hasil Karne k Liye Is Link Par Visit Kare :

www.faizeroohani.wordpress.com