● ASMA E HUSNA :- (یَا ضَارُّ) YA DAARRU ●

               ■ AMALIYAT ASMA E HUSNA ■

♥ Asma e Husna :- Ya Daarru (یَا ضَارُّ) Ki Fazilat o Wazaif

☪ Allah Ta’ala Ka Ek Sifati Naam Hai Ya Daaruu. Yani Ai Nuksan Pahochane Wale. Sifate Daarr Allah Ta’ala Ki Shane Qudrat Se Talluk Rakhti Hai. Yani Wo Log Jo Ye Soche Ke Allah Hamara Kya Kar Sakta Hai Ya Hame Kya Nuksan Pahocha Sakta Hai, To Is Soorat Me Allah Apni Is Sifat Ka Izhar Karta Hai Aur Zarar De Kar Makhlooq Ko Rahe Rast Par Aane Ki Tambih Karta Hai. Allah Aur Us Ke Dushmano Ko Nicha Dikhane Ke Liye Ye Isme Pak Bahot Mufeed Hai. Ye Isme Pak Jalali Hai Aur Kul Adad Qamari Is Isme Pak Ke 1001 Hai

☪ Shaitan Ke Hamlo Aur Waswaso Se Bachne Ke Liye Is Isme Pak Ko Subah Sham 1000 Bar Rozana Padhna Bahot Akseer Hai. Kuch Mahine Tak Padhne Se Shaitani Waswase Hamesha Ke Liye Khatm Ho Jayenge, In sha Allah

☪ Agar Koi Shakhs Har Namaz Ke Bad Is Isme Pak Ko 36 Bar Pabandi Se Padh Liya Karega To Allah Ke Fazl Se Shaitan Ke Maqr o Fareb Se Mehfuz Rahega

☪ Aisa Mureed Ya Salik Jis Ko Nafs Bahot Tang Karta Ho Aur Yaade Ilahi Se Rokta Ho, Ibadat Me Khalal Aur Rukawat Dalta Ho Use Chahiye Ke Is Isme Pak Ko Rozana 1921 Bar Pabandi Se Padhe Aur Amal Kul 120 Din Tak Jari Rakhe. In sha Allah Nafs Puri Tarah Qabu Me Aa Jayega

☪ Kisi Mureed Ya Salik Ko Kisi Roohani Maqam Par Qarar Hasil Na Hota Ho To Use Chahiye Ke Shab e Juma Ko Gusal Kare, Safed Chadar Ka Ehram Bandhe Aur Khade Ho Kar Is Isme Pak Ko 1000 Bar Wird Kare. Isi Tarah Kul 7 Shab e Juma Tak Kare. In sha Allah Roohaniyat Me Qarar Aa Jayega Aur Manzil Ki Taraf Badhne Me Aasani Hogi

☪ Agar Kisi Shakhs Ko Maal, Izzat, Ghar Wale Ya Karobar Me Kisi Tarah Ka Nuksan Pahochne Ka Andesha Ho To Use Chahiye Ke 7 Din Tak Rozana Bad Namaze Asar Is Isme Pak Ko 4141 Bar Padhe Aur Dua Kare. Allah Ke Hukm Se Har Kism Ke Nuksan Se Mehfuz Rahega. (Jab Aabadi Me Kisi Tarah Ki Bimari Fail Rahi Ho Tab Is Amal Ko Khas Kiya Jaye)

☪ Agar Koi Dushman Dushmani Se Baaz Na Aata Ho, Tang Karne Ke Tarah Tarah Ke Tarike Apnata Ho To Aise Dushman Se Bachne Ke Liye Aur Us Par Galib Aane Ke Liye Is Isme Pak Ko Rozana 6250 Bar 21 Din Tak Padhe Aur Padhte Hue Dushman Par Galaba Hasil Karne Ka Tasavvur Qayam Rakhe. In sha Allah Dushman Apni Dushmani Tark Kar Ke Maghloob Ho Jayega

☪ Ye Isme Pak Jihad Karne Walo Ke Liye Bahot Hi Zyada Mufeed Hai. Jab Dushman Par Hamla Kare Ya Gola Barood Fenke Ya Kisi Hathiyar Ka Istemal Kar Ke Waar Kare Us Wkt Is Isme Pak Ko Padh Kar Fenke Ya Waar Kare. In sha Allah Nishana Khali Nahi Jayega Aur Dushman Ko Nuksan Pahochega

☪ Jo Shakhs Maqame Irfan Tak Pahochne Ki Tamanna Rakhta Ho To Wo Har Shab e Juma Ko Is Isme Pak Ko 1001 Bar Pabandi Se Padha Kare. In sha Allah Kuch Arse Me Maqame Irfan Ata Hoga Aur Us Ke Dil Me Ma’arefat e Haq Ki Salahiyat Paida Hogi

☪ Agar Koi Shakhs Har Farz Namaz Ke Bad 41 Bar Ye Isme Pak Padhne Ka Mamool Bana Le To Us Ka Qalb Raushan Hoga. In sha Allah

☪ Jo Koi Shakhs Hamesha Chalte Firte Kasrat Ke Sath Is Isme Pak Ka Zikr Karta Rahe To Logo Ke Dil Par Us Ka Roub Qayam Hoga Aur Us Par Dushman Kabhi Ghalib Nahi Aayega. In sha Allah

☪ Agar Koi Shakhs Daulat Mand Banna Chahta Ho Ya To Izzat o Rif’at Hasil Karna Chahta Ho To Wo Har Shab e Juma Ko Aur Ayyame Beej Yani Chand Ki 13, 14, 15 Tarikh Ko Is Isme Pak Ko 100 Bar Padhta Rahe. Allah Ke Fazl Se Kuch Mahine Me Behtarina Nataij Hasil Honge

☪ Agar Koi Shakhs Kisi Tarah Ka Koi Ohda Ya Iqtedar Hasil Karna Chahta Ho To Wo Rozana Rat Ko Isha Ki Namaz Ke Bad 100 Bar Ye Isme Pak Padhne Ka Apna Mamool Bana Le

☪ Jo Koi Shakhs Is Isme Pak Ka Ye Naksh Sunday Ke Din Likh Kar Sunday Hi Ke Din Pahen Le Aur Fir Monday Ke Din Zohar Ki Namaz Ada Kar Ke Fir Amal Shuru Kare, Is Tarah Ke Is Isme Pak Ko 1921 Bar Padhe Aur 21 Din Tak Padhe. Niyat Nafs e Ammarah Ko Aur Shaitan e La’een Ko Nakam Karne Ki Niyat Se Amal Kare. In sha Allah Zabardast Kamyabi Hasil Hogi

(NAKSH YE HAI)

☪ Is Isme Pak Ka Naksh Dushmano Par Galaba Hasil Karne Ke Liye, Hasido Ke Hasad Se Bachne Ke Liye, Bad Khwaho Ki Resha Daniyo Se Najat Pane Ke Liye, Bure Logo Ki Buri Nazar Se Hifazat Ke Liye Bahot Mufeed Hai. Is Isme Pak Ke Aamil Ke Pas Banwa Kar Apne Pas Rakha Jaye To Bahot Fawaid Hasil Honge

☪ Agar Koi Shakhs Is Isme Pak Ka Aamil Banna Chahe To Us Ke Liye Amal Nau Chandi Jumerat Se Shuru Kare Aur Mukammal Parhez Jalali Jamali Ke Sath Chille Ki Tamam Sharaito Par Amal Karte Hue 40 Din Tak Rozana Bad Namaze Isha Tanhai Me Ye Isme Pak 3125 Padhe, To 40 Din Ke Bad Aamil Ban Jayega. Fir Rozana 1001 Bar Is Isme Pak Ka Vird Karta Rahe. Aamil Banne  Ke Bad Zarurat Mando Ko Is Isme Pak Ka Taveez Diya Ja Sakta Hai

■ ROOHANI ILAJ Group Me Shamil Hone Ke Liye Apna Name, Whatsapp Mobile No. Aur City Name Niche Diye Gaye No Pe Msg Kare...

+91 99795 78644

● ROOHANI ILAJ ki Purani Post Hasil Karne k Liye Is Link Par Visit Kare :

www.faizeroohani.wordpress.com

● ASMA E HUSNA :- (یَا مَانِعُ) YA MANIOO ●

               ■ AMALIYAT ASMA E HUSNA ■

♥ Asma e Husna :- Ya Manioo (یَا مَانِعُ) Ki Fazilat o Wazaif

★ Allah Ta’ala Ka Ek Sifati Naam Hai Ya Manioo. Yani Ai Mana Karne Wale. Yani Allah Ta’ala Kisi Bhi Chiz Ko Rokne Ka Mukammal Ikhteyar Rakhta Hai. Matlab Ye Ke Koi Chiz Agar Kisi Bande Ke Haq Me Behtar Nahi Hai Aur Wo Us Ki Talab Rakhta Hai To Beshak Allah Ta’ala Us Nuksan Deh Chiz Ko Us Ke Pas Jane Se Ya Us Chiz Ko Hasil Karne Se Bande Ko Rokta Hai Aur Takleef Se Bachata Hai. Is Baat Ka Zikr Qurane Pak Me Surah Al Baqarah Aayat No. 216 Me Milta Hai. Neez Allah Ta’ala Wo Shaitani Quwwate Jo Burai Paida Karti Hai, Use Nest o Nabood Aur Tabah Karne Ki Puri Taqat Rakhta Hai. Isi Liye Use Is Naam Se Bhi Pukara Jata Hai. Ye Isme Pak Jalali Hai Aur Kul Adad Qamari Is Isme Pak Ke 161 Hai

★ Ye Isme Pak Allah Ta’ala Ki Shane Qudrat Se Talluk Rakhta Hai. Dushman Ka Vaar Aur Dushmani Se Rokne Ki Bahot Zyada Taseer Is Isme Pak Me Hai. Is Liye Is Isme Pak Ko Kasrat Ke Sath Padhne Wala Hamesha Dushmano Se Mehfuz Rehta Hai. Koi Dushman Use Dhoka Ya Fareb Nahi De Sakega

★ Agar Kisi Bande Ko Koi Shakhs Bar Bar Tang Aur Pareshan Karta Ho Aur Pichha Na Chhodta Ho To Use Chahiye Ke Rat Ke Aakhari Hisse Me Yani Khatm e Sehri Ke Wakt Se Pehle Rozana Is Isme Pak Ko 161 Bar Padh Liya Kare Aur Dua Kare. In sha Allah Khulasi Hasil Hogi

★ Aksar Bure Log Jawan Ladkiyo Aur Aurato Ke Piche Pad Jate Hai Ya Kisi Shareef Aadmi Ke Ghar Ja Kar Buraiyo Wale Kam Karte Hai. Aise Me Un Bure Logo Ko Un Ki Burai Se Rokne Ke Liye Rozana Isha Ke Bad Ye Isme Pak Tanhai Me Baith Kar 11000 Bar Padhe Aur Apne Maksad Ki Dua Kare. Amal Kul 11 Din Tak Kare. In sha Allah Us Bure Shakhs Ki Burai Khud Ba Khud Ruk Jayegi Aur Padhne Wala Mehfuz Ho Jayega

★ Jis Shakhs Ki Aulad Ya Kisi Ka Shauhar, Bhai, Baap Wagairah Bure Kam Me Ya Burai Me Mubtala Ho Jaise Nasha, Chori, Zina, Sharab Wagairah Aur Wo Apne Bure Kam Chhodne Par Razi Na Ho To Rozana Is Isme Pak Ko 6250 Bar Padh Kar Dua Kar Ke Pani Pe Dam Kar Ke Wo Pani Pilaya Kare. Amal Kul 40 Din Tak Kare. In sha Allah Pani Pine Se Us Ka Dil Bure Kam Se Ruk Jayega

★ Agar Kisi Ki Biwi Bahot Na Farman Ho, Shauhar Ki Khidmat Na Karti Ho, Us Ki Zarurato Ko Pura Na Karti Ho Ya Kisi Ka Shauhar Bad Mijaz Ho, Biwi Aur Bacho Ki Taraf Dhyan Na Deta Ho, Kam Kaj Na Karta Ho Ya Dosto Me Din Bhar Aawara Gardi Karta Rehta Ho To Chahiye Ke Rozana Apne Tamam Mamoolat Se Farig Hone Ke Bad Sote Wakt Ye Isme Pak 1100 Bar Padhe Aur Dua Kar Ke Fir Soye. In sha Allah Kuch Din Ke Amal Se Result Hasil Ho Jayega

★ Aise Mureedin Ya Aamil Jo Apne Field Me Naye Naye Ho Aur Amaliyat Ya Wazaif Padhne Ke Dauran Dil Me Khauf Aata Ho To Rozana Apna Amal Ya Wazeefa Shuru Karne Se Pehle Ye Isme Pak 100 Bar Padh Liya Kare. In sha Allah Har Kism Ka Khauf Dur Ho Jayega Aur Wo Har Kism Ke Sharr Se Hisar Me Aa Jayenge

★ Jin Miya Biwi Ke Darmiyan Nafrat Ka Mamla Ho Aur Aksar Jhagde Lage Rehte Ho Aur Wo Dono Miya Biwi In Jhagdo Se NIjat Chahte Ho To Dono Ko Chahiye Ke Rat Ko Sote Wakt Bister Par Ja Kar Is Isme Pak Ko 120 Bar Padh Liya Kare Aur Amal Ko Us Wakt Tak Jari Rakhe Jab Tak Dono Ke Darmiyan Ke Ladai Jhagde Hamesha Ke Liye Khatam Nahi Ho Jate

★ Miya Biwi Ki Aapas Ki Na Ittefaqi Ko Dur Karne Ke Liye Ek Bottle Me Pani Le Kar Us Pani Par Ye Isme Pak 161 Bar Padh Kar Dua Kar Ke Dam Kare Aur Fir Us Bottle Me Se Dono Miya Biwi 1 Hafte Tak Pani Pite Rahe Aur Us Me Milate Rahe. Fir Agle Hafte Isi Tarah Naya Pani Bana Le, Aur Isi Tarah Kul 7 Hafte Tak Ye Amal Kare. Yani Har Haftr Naya Pani Banaye.  In sha Allah Aapasi Ranjishe Khatam Ho Jayegi. Ye Hi Amal Ghar Ke Digar Members Ki Aapas Ki Na Ittefaqi Ko Dur Karne Ke Liye Bhi Isi Tarah Se Kiya Ja Sakta Hai

★ Hasido Ke Hasad Se Bachne Ke Liye Is Isme Pak Ko Maksad Dil Me Rakh Kar Rozana Pabandi Se 170 Bar Padh Kar Dua Kare. In sha Allah Hasido Se Mehfuz Rahenge

★ Agar Koi Shakhs Rozana Subah Sham Is Isme Pak Ko 100 Bar Padhne Ka Apna Mamool Bana Le To Us Ke Mijaz Me Se Tamam Buraiya Khatm Ho Jayegi Aur Wo Nek Dil Ban Jayega. In sha Allah

★ Agar Kisi Ilaqe Me Tiddiya Aur Digar Kido Ka Hamla Ho Aur Wo Kheto Aur Fasalo Ko Barbad Kar Rahe Ho To Chahiye Ke Mitti Ki 4 Nayi Kori Thikariya Jis Me Umooman Chirag Jalaya Jata Hai, Le Kar Har Ek Par 7 Bar Ye Isme Pak Likh Kar Khet Ke Charo Kono Me Dafan Kar Diya Jaye. In sha Allah Khet Har Tarah Ke Nuksan Se Mehfuz Rahega

★ Agar Kisi Bache Ko Bar Bar Nazar Lag Jati Ho To Khalis Seese Ki Takhti Banwa Kar Us Par 7 Bar Ye Isme Pak Qandah Karwa Liya Jaye Aur Bache Ko Gale Me Pehna Diya Jaye. In sha Allah Bacha Nazare Bad Se Mehfuz Rahega

★ Agar Koi Shakhs Rozana Is Isme Pak Ki 1 Tasbih Padhne Ka Apna Mamool Bana Le To Har Aasmani Aur Zameeni Nagahani Aafato Se Mehfuz Rahega. In sha Allah

★ Agar Koi Shakhs Kisi Ki Dushmani Se Pareshan Ho Aur Chahta Ho Ke Dushman Dushmani Na Kare To Use Chahiye Ke Rozana Bad Namaze Fajar, Zohar Aur Isha Ke Ye Isme Pak 100 Bar Padhe Aur Us Dushman Ka Naam Le Kar Dua Kare. In sha Allah Us Dushman Aur Us Ki Dushmani Se NIjaat Mil Jayegi

★ Agar Koi Shakhs Is Isme Pak Ka Aamil Banna Chahe To Us Ke Liye Amal Nau Chandi Jumerat Se Shuru Kare Aur Mukammal Parhez Jalali Jamali Ke Sath Chille Ki Tamam Sharaito Par Amal Karte Hue 4 Mahine Tak Rozana Bad Namaze Isha Tanhai Me Ye Isme Pak Padhe Aur Kul 4 Mahine Me 11 Lakh Ki Tadad Ko Pura Kare, To 4 Mahine Ke Bad Aamil Ban Jayega. Fir Rozana 161 Bar Is Isme Pak Ka Vird Karta Rahe. Aamil Banne  Ke Bad Zarurat Mando Ko Is Isme Pak Ka Taveez Diya Ja Sakta Hai

■ ROOHANI ILAJ Group Me Shamil Hone Ke Liye Apna Name, Whatsapp Mobile No. Aur City Name Niche Diye Gaye No Pe Msg Kare...

+91 99795 78644

● ROOHANI ILAJ ki Purani Post Hasil Karne k Liye Is Link Par Visit Kare :

www.faizeroohani.wordpress.com

● ASMA E HUSNA :- (یَا مُغْنِیْ) YA MUGHNI ●

               ■ AMALIYAT ASMA E HUSNA ■

♥ Asma e Husna :- Ya Mughni (یَا مُغْنِیْ) Ki Fazilat o Wazaif

★ Allah Ta’ala Ka Ek Sifati Naam Hai Ya Mughni. Yani Ai Be Parwah Karne Wale. Yani Wo Zaat Jo Logo Ko Be Parwah Karne Ki Qudrat Rakhti Hai. Is Naam Se Muttasif Hone Se Murad Ye Hai Ke Allah Ke Siwa Banda Har Ek Zaat Aur Har Ek Chiz Se Be Parwah Ho Jaye Aur Allah Ta’ala Ke Siwa Kisi Ke Aage Apna Daman Na Faiyale, Aur Allah Apne Bando Ko Apne Fazl o Karam Se Har Tarah Se Be Niyaz Aur Be Parwah Kar Deta Hai. Ye Isme Pak Jamali Hai Aur Kul Adad Qamari Is Isme Pak Ke 1100 Hai

★ Ye Isme Pak Gani Aur Maaldar Banne Ke Liye Bahot Mufeed Hai. Jo Shakhs Gani Banne Ka Khwahish Mand Ho To Use Chahiye Ke Is Isme Pak Ko Rozana 7000 Bar 3 Saal Tak Padhta Rahe, Aur Amal Ke Shuru Me 11 Bar Astagfar Padhe. In sha Allah Be Panah Maal o Daulat Hasil Hogi

★ Jo Shakhs Har Dil Azeez Hona Chahta Ho Wo Is Isme Pak Ko Rozana 1100 Bar Padhe Aur Is Isme Pak Ke Aamil Se Is Ka Naksh Bhi Banwa Kar Pas Me Rakhe. In sha Allah Har Koi Izzat Se Pesh Aayega

★ Har Kisi Ki Khwahis Hoti Hai Ke Use Zarurat Ke Mutabik Rizk Hasil Hua Kare. Ta Ke Us Ki Zindagi Sukoon Ke Sath Aur Aaram Ke Sath Guzre. Use Chahiye Ke Har Juma Ko Bad Namaze fajar Ye Isme Pak 7000 Bar Padhe Aur Aasani Se Rizk Milne Ki Dua Kare, Aur 10 Juma Tak Ye Amal Karta Rahe. In sha Allah Aasani Se Aur Barkat Wala Rizk Hasil Hoga

★ Agar Kisi Ki Ladki Ke Rishte Ke Paigham Na Aate Ho Ya Rishta To Ho Gaya, Lekin Shadi Sirf Is Wajah Se Nahi Ho Pa Rahi Hai Ke Maal o Asbab Nahi Hai. To Us Shakhs Ko Chahiye Ke Nau Chandi Jumerat Se Amal Shuru Kare. 2 Raka’at Nafal Namaz Padhe. Salam Fer Kar Ye Isme Pak 11000 Padhe. Fir Apne Maksad Ki Dua Kare. Amal 11 Din Tak Kare. In sha Allah Us Ki Gaib Se Madad Hogi Aur Allah Us Bachi Ki Shadi Ka Zariya Bana Dega

★ Hzrt Abul Abbas Imam Ahmed Bin Ali Boni Farmate Hai Ke Ise Padhne Se Gana Hasil Hota Hai, Kashf Khulta Hai, Karamate Sarzad Hoti Hai. Shart Ye Ke Allah Us Bande Se Razi Ho. Jo Is Ko Subah Sham 100 Bar Padhne Ka Mamool Bana Leta Hai Use Be Hisab Barkate Hasil Hoti Hai

★ Jo Shkahs Is Isme Pak Ko Rozana 1100 Bar Padha Karega Us Ke Andar Dusro Ki Madad Karne Ki Zabardast Salahiyat Paida Hogi. Had Se Zyada Karimun Nafs Aur Khsh Akhlaq Hoga. Logo Ki Hamesha Madad Karta Rahega, In sha Allah

★ Agar Koi Shakhs Hamesha Ke Liye Rozana Is Isme Pak Ko 1100 Bar Padhne Ki Aadat Bana Le To Zabardast Futoohat Us Ke Hisse Me Aayegi Aur Gair Mamooli Tarike Se Tawangar Aur Maaldar Hoga

★ Agar Koi Shakhs Har Juma Ko Juma Ki Namaz Se Farig Hone Ke Bad 7000 Bar Ye Isme Pak Padhe To Allah Apne Fazl Se Us Bande Ko Makhlooq Ki Mohtaji Se Mehfuz Rakhega, In sha Allah

★ Agar Koi Shakhs Rozana Bad Namaze Fajar Ye Dua 70 Bar Padhe To Kuch Hi Arse Me Maaldar Hoga In sha Allah. Dua Ye Hai :-

یَا غِنِیُّ یَا حَمِیْدُ یَا مُبْدِئُ یَا مُعِیْدُ یَا فَعّالُ لِّمَا یُرِیْدُ یَا رَحِیْمُ یَا وَدُوْدُ اَغْنِنِیْ بِفْضْلِکَ عَمَّنْ سِوَاکْ ؁

★ Agar Koi Shakhs Is Isme Pak Ka Ye Naksh Zul Kitabat Is Isme Pak Ke Aamil Se Likhwa Kar Apne Pas Rakhe. Fir 11 Din Tak Rozana Pehle Sure Wadduha 1100 Bar Padhe, Fir Ye Dua 100 Bar Padhe, To Allah Apne Fazl Se Use Har Chiz Se Be Parwah Kar Dega. Aur Ye Amal Agar 40 Din Tak Kar Liya To Charo Taraf Se Daulat Aane Ke Darwaze Khul Jayenge. In sha Allah

(NAKSH KI IMAGE YE HAI)

Dua Ye Hai :-

اَللّٰہُمَّ یَسِّرْ عَلَی الْیُسْرِ الَّذِیْ یَسَّرْتَہٗ عَلٰی کَثِیْرٍ مِّنْ عَبَادِکَ وَ اَغْنِنِیْ بِفَضْلِکَ عَمَّنْ سِوَاکْ ؁

★ Agar Koi Shakhs Is Isme Pak Ka Aamil Banna Chahe To Us Ke Liye Amal Nau Chandi Jumerat Se Shuru Kare Aur Mukammal Parhez Jalali Jamali Ke Sath Chille Ki Tamam Sharaito Par Amal Karte Hue 40 Din Tak Rozana Bad Namaze Isha Tanhai Me Ye Isme Pak 12500 Bar Padhe To 40 Din Ke Bad Aamil Ban Jayega. Fir Rozana 110 Bar Is Isme Pak Ka Vird Karta Rahe. Aamil Banne  Ke Bad Zarurat Mando Ko Is Isme Pak Ka Taveez Diya Ja Sakta Hai

■ ROOHANI ILAJ Group Me Shamil Hone Ke Liye Apna Name, Whatsapp Mobile No. Aur City Name Niche Diye Gaye No Pe Msg Kare...

+91 99795 78644

● ROOHANI ILAJ ki Purani Post Hasil Karne k Liye Is Link Par Visit Kare :

www.faizeroohani.wordpress.com